La Serada foguèt un polit succès !

La Sala de las Fèstas del Palais del Trabalh meritava plan son nom, divendres 27 de febrièr, per la Serada que lo Cercle Occitan de Narbona organiza desempuèi qualques annadas.

Es vengut un eveniment, e se a de fidèles, de novèls i corrisson, seduits per un programa a l'encòp original e per totes los publics.

La Serada es un tot, amb son ambient plan sieu, a l'encòp tranquil e joiós, mas un tot fòrça variat.

L'iniciation a las danças tradicionalas, animada per Acordéons nos violons e Ives Seguièr, càmbia. Venon de mòda dins de publics joves coma pas tant joves qu'aquò.

Es un mejan agradiu mas pas indispensables per se lançar a fons dins lo balèti, subretot quand se mena amb lo dinamisme esclatant del grop Los Gojats, amb de musica e de cançon

occitana de polida qualitat. Los dançaires se'n poguèron donar a bèl èime.

Los que dançavan pas ne profitèron tanben, installats a las taulas o a la banca de la Calandreta La Granhòta.

L'interludi amb los cants de Las Farfantèlas reculhiguèt totes los sufragis.

La salsa, la ligava l'animacion sonòra assegurada per Ràdio Lenga d'Òc Narbona 95.5.

De mainatges escandilhats, que los parents regretavan pas de los aver menats, èran l'imatge del plaser general d'aquela jornada.

Una ocasion requista per conéisser la varietat de la creacion musicala occitana, de dançar, de se rescontrar, d'avançar en occitan, de profitar del taulièr del Cercle Occitan amb sos libres,

disques e articles divèrses. (Per quelques rebats de la Serada 2015 : www.cercle-occitan-narbona.fr)